ថៃយកលេសចោទកម្ពុជា ដើម្បីឆ្លៀតឱកាសប្រើប្រាស់អាវុធកាន់តែសាហាវវាយលើកម្ពុជា

ភាគីថៃ នៅតែបន្តបើកការវាយប្រហារមុនមកលើកម្ពុជា នៅតំបន់ប្រាសាទតាមាន់ធំ ប្រាសាទតាក្របី ដោយបានបាញ់ស្រោចរហូតមក ចាប់ពីម៉ោង៣រំលងអធ្រាត ដល់ម៉ោង៥ព្រឹក។ នេះបើតាមលោកស្រី ម៉ាលី សុជាតា ថ្លែងក្នុងសន្និសីទកាសែតស្តីពីបច្ចុប្បន្នភាពនៃការឈ្លានពានរបស់ថៃមកលើទឹកដីកម្ពុជា នាម៉ោង៧ព្រឹកថ្ងៃទី២៨ កក្កដា ២០២៥។

«ភាគីថៃវាយប្រហារបណ្ដើរ ចោទកម្ពុជាបណ្ដើរ»។ លោកស្រី ម៉ាលី សុជាតា បានច្រានចោលព័ត៌មានប្រឌិតរបស់ភាគីថៃ ដែលបានចោទប្រកាន់មកលើកម្ពុជាថា បានប្រើប្រាសមីសីលចម្ងាយឆ្ងាយ PHL-03 វាយប្រហារលើទឹកដីថៃ។ បើតាមអ្នកនាំពាក្យក្រសួងការពារជាតិកម្ពុជា គិតមកដល់ម៉ោងនេះ កម្ពុជា មិនទាន់បានប្រើប្រាស់អាវុធធុនធ្ងន់ប្រភេទនេះ វាយប្រហារបកទៅកាន់ភាគីថៃវិញឡើយ។

ផ្ទុយពីការចោទប្រកាន់ខាងលើ លោកស្រី សុជាតា បានកត់សម្គាល់ឃើញថា ភាគីថៃ កំពុងប្រើប្រាស់វោហោសាស្រ្តចោទប្រកាន់មកលើកម្ពុជាបែបនេះ ដើម្បីធ្វើជាលេសសម្រាប់ពួកគេ អាចប្រើប្រាស់អាវុធកាន់តែសាហាវឃោឃៅ វាយប្រហារមកលើកម្ពុជា ទាំងកម្រោលប៉ុណ្ណោះ។ បើតាមអ្នកនាំពាក្យរូបនេះ កាលពីថ្ងៃទី២៧ កក្កដា ភាគីថៃបានប្រើដ្រូនអត្តឃាត គ្រាប់បែកចង្កោម និងផ្សែងពុលនៅតំបន់ភ្នំខ្មោច និងតំបន់អានសេះ រួមទាំងប្រើយន្តហោះចម្បាំងបាញ់គ្រាប់រ៉ូកែតជាច្រើនគ្រាប់នៅប្រាសាទតាមាន់ធំ ប្រាសាទតាក្របី និងទីតាំងមួយចំនួនទៀត ក្នុងដែនដីកម្ពុជា ដែលវាផ្ទុយពីអនុសញ្ញា និងច្បាប់អន្តរជាតិ។

ក្រសួងការពារជាតិ ទាមទារឱ្យភាគីថៃ បញ្ឈប់សកម្មភាពប្រឌិតរឿង និងព័ត៌មានក្លែងក្លាយ ដើម្បីបំភាន់ភ្នែក និងត្រចៀកពិភពលោក អំពីមហិច្ឆតា និងគោលបំណងឈ្លានពានលើទឹកដីកម្ពុជាតទៅទៀត។ កម្ពុជា មិនដែលប្រព្រឹត្តទុច្ចរិតដូចភាគីថៃឡើយ ហើយកម្ពុជា ក៏គ្មានមហិច្ឆតាចង់ឈ្លានពានទឹកដីគេ ដូចប្រជាជាតិថៃដែរ៕